من قلب الفوضى لرسالة النور: هكذا بدأت الحكاية
- هذه المنصة ما تولداتش من كتاب أو فكرة عابرة، بل تولدات من رحم تجربة حقيقية، من قلب الألم والفوضى. كانت حياتي عبارة عن تمرد وغضب، كنسعى نثبت وجودي للعالم وأنا أصلا ما عارفاش شكون أنا. كنت كنبيع “الجمال الخارجي” وأنا من الداخل تائهة وكنقلب على بوصلة.
- التوقف الإجباري ديال كورونا كان هو نقطة التحول. تما فين سمعت صوت روحي لأول مرة كيقولي بلي رسالتي أعمق. ديك الساعة، قررت نغوص فبحر الوعي، وواجهت كل البركانات لي كانت مدفونة فيا. من داك الرماد، تولدت رؤية جديدة: نكون ديك المرآة الصادقة والآمنة لي أنا براسي كنت محتاجاها. هاد المنصة هي ثمرة ديك الرحلة، هي بيت لكل روح مستعدة ترجع لأصلها، وتتذكر شكون هي بصح.
رؤيتنا: عالم يعيش بوعي كوني
كنحلمو بعالم كينتقل فيه الإنسان من وعي أرضي محدود مبني على الصراع، إلى وعي كوني واسع مبني على التسليم، الامتنان، والتوحد مع الرحمة الإلهية. عالم كيعيش فيه كل واحد حقيقته النورانية، وهو متصالح مع ظله ونوره.
المبادئ التي تضيء طريقنا
- المرآة الآمنة: كنخلقو ليك فضاء آمن بلا أحكام، فين تقدر تشوف نورك وظلك وتلتقي مع نفسك بأمان تام.
- الاحتواء الواعي: كنحتضنو كلشي فيك: جراحك، تناقضاتك، فوضاك… حيت كل تجربة فيها رسالة وكل ألم هو باب للفهم.
- النية والاستعداد: كنآمنو أن كل روح كتجي فتوقيتها الإلهي المناسب. النية الصادقة هي المفتاح، والاستعداد هو لي كيفتح الباب.
- الحرية والمسؤولية: كنشجعوك تسترجع السيادة على حياتك. الهدف هو تتحرر من الداخل، وتعيش حياتك كخالق واعي ماشي كضحية.
- البساطة العميقة: كنعبرو على أعقد المفاهيم ببساطة وصدق، وكنربطو الحكمة بالواقع، والنور بالظل، والصرامة باللطف.
- الليونة والانضباط: كنوازنو بين الحزم واللين، وكنحصنو المجال الطاقي ديال كل واحد كيدخل معانا للتجربة باش تكون رحلته آمنة ومقدسة
منهجيتنا: طريق واضح نحو العمق
الخدمة ديالنا مبنية على منهج متكامل ومعتمد من أكاديمية الطاهري بكندا، أسسه البروفيسور محمد علي الطاهري. هاد المنهج كيمزج بين المعرفة النظرية والتجربة التطبيقية، وكيتقسم على مرحلتين أساسيتين:
سير الأنفس
رحلة لداخل الذات، باش نفهمو النفس، العقل، الروح والجسد، ونتحررو من كاع المعيقات.
سير الآفاق
امتداد من الذات للعالم الخارجي، باش نخدمو الجماعة ونشاركو الوعي فالمجال ديالنا.
هادشي كامل كيتم عبر جلسات مباشرة، دورات مسجلة، مواكبة، وتدرج مدروس كيحترم المسار ديال كل واحد.
واجد(ة) تبدا رحلة العودة للأصل؟
إذا كانت هاد الكلمات لمسات فيك شي وتر حساس، فهادي ماشي صدفة. هادي دعوة من روحك باش تبدا رحلة التذكر. حنا هنا كنرافقوك.
هل أنت مستعد لبدء حوارك الأعمق مع نفسك؟